Abigail na Abe

Maisha ya utulivu pamoja

Abigail alipenda kufanya kazi. Aliweza kuketi tangu saa mbili asubuhi hadi saa mbili usiku bila kuinuka, akichukua pumziko moja au mawili tu ya dakika moja kwenda chooni na dakika ishirini za chakula cha mchana, akiketi mezani.

Baada ya kazi, alipika chakula cha jioni, kisha TV, akilala kwenye kochi kwa saa tatu, kisha usingizi.

Abe, kwa upande mwingine, hakupenda kuketi. Alipofanya kazi, alisimama. Hakuweza kutulia. Mara nyingine angeketi, akasimama, akaketi, akasimama, kisha kwenda matembezi marefu, akiangalia, akistaajabu, akizurura.

Alipenda kutembea kando ya mto. Bado ungeweza kusikia magari huko, lakini si sana.

Mara nyingine Abe alimshawishi Abigail watembee. Mara nyingine Abigail alimshawishi Abe watazame TV.

Abe alitaka kuondoka kabisa, kuliacha jiji lenye msongamano milele.

Abigail alitaka kufanya kazi.

Tayari walikuwa na pesa za kutosha kufanya chochote walichotaka, lakini kile ambacho Abigail alitaka kufanya zaidi ya yote kilikuwa kazi.

Abe alikwenda kwa daktari. Aligundua kwamba hakuwa na muda mwingi wa kuishi. Miaka mitano zaidi sana, pengine miwili au mitatu, labda mmoja tu.

"Sikuzuii kwenda popote", alipaaza sauti Abigail. "Ukitaka kwenda, nenda."

Abe daima alikuwa ameota kuwa huru pamoja na Abigail, akiishi kutoka mahali hadi mahali, akiona dunia, akionja maisha.

Alimsubiri Abigail, akabaki jijini kupitia majira ya baridi na ya joto.

Alijikunyata sakafuni kando ya miguu ya Abigail huku akigonga vifungo vya kompyuta tangu saa mbili hadi saa mbili.

Abe alifanya matembezi yake, lakini hakwenda mbali sana.

Mwaka mmoja ulipita, kisha mwingine. Madaktari walikuwa wamekaribia kuwa sahihi. Ilimchukua Abe miaka mitatu kufa.

Alikufa akiwa anaangalia kipindi cha TV pamoja na Abigail.

Abigail alimzika Abe, kisha akarudi kazini.

Hadithi na Pemba Umoja