Red Delicious

Matembezi ya Vuli

Alice hakuwahi kuchuma matufaha kabla ya hapo. Joseph alifurahi kumwalika aungane na wazazi wake na ndugu yake wa kiume kwa matembezi yake ya kwanza ya kuchuma matufaha.

Matufaha ya Red Delicious ndiyo aliyoyapenda zaidi, lakini alikuwa ameonja tu yale ya maduka makubwa yaliyofunikwa kwa tabaka jembamba la nta ya kuyahifadhi, ambayo yangeweza kukaa miezi kadhaa kwenye maghala na malori yenye matrela kabla ya kufika kwenye rafu za maduka.

Hii ingekuwa fursa ya kwanza ya Alice kuchuma matufaha mwenyewe kutoka mitini.

Damien na binamu zake pia walikuwa wakipanga matembezi. Kundi la watoto lingeenda pia. Alitaka kutoka kwenye gereji yake. Biashara ilikuwa imeenda vizuri, vizuri kiasi kwamba alitumia sehemu kubwa ya wiki yake chini ya magari na pikipiki. Alirudi nyumbani akiwa amejaa grisi. Ilikuwa vigumu hasa kuiondoa kwenye masharubu yake ya kahawia iliyokolea, ambayo mara nyingi yalionekana meusi tu kutokana na mafuta yote yaliyokuwa yakimdondokea.

Mara nyingi alirudi nyumbani kwa kundi lake la watoto akiwa amechoka sana. Wote walitaka muda wa kuwa na baba yao, lakini mara nyingi alikuwa mwepesi wa kukasirika. Alitaka kufurahia matembezi na kuwa mfano bora zaidi kwa watoto wake. Masharubu yake yalikuwa bado meusi. Ijumaa ilikuwa siku ngumu hasa gerejini.

Alice, Joseph, wazazi wake na ndugu yake wa kiume waliingia kwenye bustani ya mitufaha. Walitembea huku na kule katikati ya safu za miti. Alice alijisikia kama mtoto katika duka la peremende za tufaha, lakini hakukuwa na matufaha ya Red Delicious popote.

Joseph alimuuliza mmoja wa wafanyakazi wahamiaji shambani.

“Tunayo kule, lakini yamezingirwa kwa kamba kwa sababu bado hayajawa tayari kabisa. Lakini msijali, mnaweza kuchuma machache.”

Uso wa Alice uling’aa kwa furaha huku taswira za matufaha ya Red Delicious zikichezacheza kichwani mwake.

Waliendelea kutembea wakipita safu za aina nyingine: Cortland, Jonagold, McIntosh. Njiani walipita kundi kubwa la familia moja, na hapo yalikuwepo, yale ya Red Delicious. Yamezingirwa kwa kamba pamoja na kibao kilichoandikwa msichume.

Alice alinyoosha mkono kuvuka kamba na kuchuma tufaha kubwa zaidi na jekundu zaidi aliloweza kupata.

“Nimeona ulivyofanya!” alipaza sauti mwanamume mmoja mnene mwenye ndevu katika lile kundi la familia walilolipita.

Alice alidhani alikuwa anatania. Alice alichuma tufaha jingine, na Joseph, baba yake na ndugu yake wa kiume wakafanya vivyo hivyo.

Walichuma na kuonja matufaha hayo yaliyokatazwa upande wa pili wa kamba, kisha wakarudi na mifuko yao wakielekea nje.

Damien aliwaona wale wavunja sheria wakikaribia. Hakuamini alichokiona. Kulikuwa na kibao kilichoandikwa “msichume” mbele ya macho yao, lakini hilo ndilo hasa walilofanya.

“Nyinyi, tumewaona. Mnawaharibia wengine wote,” aliwakemea. “Hamjui kwamba hampaswi kufanya hivyo?”

Familia ile ya wezi wa matufaha haikusema neno.

“Najua mnanisikia,” alisema, akiwachokoza.

Aliwatupia macho watoto wake. Nao wakamtupia macho baba yao kwa fahari.

Baba yake Joseph alitembea hatua chache kisha akageuka.

“Walituambia tunaweza kuyachuma,” alijibu.

Damien alimkodolea macho bila uso wake kuonyesha chochote.

“Kwa nini usijikite kuwakemea watoto wako mwenyewe na kushughulika na mambo yako,” baba yake Joseph aliendelea.

“Ninashughulika na mambo yangu,” Damien alijibu.

Watoto wake walitazama wakiwa wamechanganyikiwa.

Alice aliliweka lile tufaha nono la Red Delicious kwenye mfuko kimyakimya.

Alice, Joseph na familia yake wakaondoka.

Damien na familia yake waliendelea kuchuma matufaha upande unaofaa wa kamba.

Mvua ilianza kunyesha.

A story by Pemba Umoja